Қызметтік борышын атқару үстінде көрсеткен ерлігі мен жанқиярлығы үшін ІІІ дәрежелі "Айбын" орденімен Тоғызбаев Айдос Ерланұлы (марқұм) наградталды. Ол Абай облысы Төтенше жағдайлар департаменті өрт сөндіру және авариялық-құтқару жұмыстары қызметі №14 өрт сөндіру бөлімінің жүргізушісі болған.
Сондай-ақ №14 өрт сөндіру бөлімінің бөлімше командирі Тұрлыбеков Амангелді Айтмұхашұлы да марапатталды.
"Ерлігі үшін" медалін №14 өрт сөндіру бөлімінің өрт сөндірушісі Нұрлан Сәлімжан алды.
Олардың барлығы Абай облысындағы Жарма ауданындағы табиғи өртті сөндіруге қатысқан.
Жел бағытының өзгеруіне байланысты өрт автоцистернаға өткен. Автоцистерна мен КамАЗ су таситын көлігі толығымен жанып кетіп, өрт сөндірушілер күйіп қалған. Солардың бірі Тоғызбаев кейін қайтыс болды.
