Әділет министрі Ерлан Сәрсембаев әділет саласына цифрландыруды енгізу арқылы қандай лауазымдар қысқартылуы мүмкін екеніне пікір білдірді, деп хабарлайды inbusiness.kz сайты
Осыған дейін Премьер-министр цифрландыру арқылы әділет саласындағы "артық шығындарды, артық құрылымдарды, артық адамдарды қысқарту керек" деп айтқан еді.
Тілшілер министр Ерлан Сәрсембаевтан "адамдардың "артық" екенін қалай анықтайсыздар" деп нақтылады.
"Өте жақсы сұрақ. Біз осы жұмысты қатарымен жүргіземіз. Үкіметтің отырысында бірқатар ұсынысты айттым. Әсіресе, сот сараптамасы жөніндегі, сот орындаушылардың арасында болып жатқан проблемаларды айттым. Оның бәрін цифрландыру керек. Қазір ғана айтып кеткенімдей, робот сот орындаушыларының жұмыстарының арқасында бірқатар лауазымдарды қысқартсақ деген ойымыз бар. Қазір біз анализ жасап жатырмыз", – деді ведомство басшысы.
Журналистер қанша адам жұмыстан шығарылуы мүмкін екенін нақтылады.
"Жалпы айтқанда, министрліктің саясаты – халыққа қызмет көрсету сапасын арттыру. Сол тезистің арқасында біз көрсетілген қызметтің қолжетімділігі мен ашықтығын қамтамасыз етеміз. Бұл біздің ең бірінші мақсатымыз. Қысқарту басты назарда емес. (...) Біз біраз лауазымдарды қысқартуға дайынбыз. Біз алдымен осы пилоттық бағдарламаларды жүргізіп, анализ жасауымыз қажет", – деді Ерлан Сәрсембаев.
