Африн аймағындағы күрд жасақтары түрік күштерімен тізе қосып соғысып жатқан "Сирия еркін әскері" топтарымен қақтығысқа түсіп, Хадж-Биляль мекенін қайтарып алды. Күрдтердің шабуылынан 25 сарбаз оққа ұшып, түріктің 1 танкі жойылған. Түрік әскерилері болса тікұшақпен Хелиль және Дейр-Баллут округін шабуылдап, соққы берді, деп хабарлайды 24.kz.
Жалпы күрдтердің "Халықтық өзін-өзі қорғау күштері" оларға қарсы операция басталғалы 670-ке жуық түрік және сириялық сарбазды мерт еткенін хабарлайды. Түркия бас штабы болса тек 30 сарбазынан айырылғанын, ал күрдтердің 1 мыңнан астам жауынгерінің көзін жойғанын мәлімдеді.
Айта кетейік, қаңтар айында Түркия Африн провинциясында АҚШ-тың "шекара қауіпсіздігін күзету" үшін құрған күрд жасақтарына қарсы әскери операция бастаған. Өйткені Анкара бұл күштерді "Күрдістан жұмысшы партиясымен" байланыстағы лаңкестік жасақтар деп біледі.
