"Астана" халықаралық қаржы орталығы үш жылдай бюджет есебінен қаржыландырылады. Осылайша, үш жылда орталық қызметін ұйымдастыруға және жүргізуге 60 млрд теңге бөлінбек. Бұл туралы баспасөз-мәслихатында АХҚО басқарушысы Қайрат Келімбетов айтты, деп хабарлайды abctv.kz.
"Барлық қаржы көздері арқылы орталық жұмысына жыл сайын шамамен 20 млрд теңге бөлінеді. Биылғы бюджетте дәл осы көлемдегі сома қарастырылған. Орталық алдағы үш-бес жылдың ішінде өзін-өзі ақтайды деп күтілуде. Осылайша, бюджеттен бөлінетін қаржы да біртіндеп азая бермек", – деді Қайрат Келімбетов.
АХҚО басқарушысының сөзіне сенсек, орталық алдағы бес жыл ішінде кем дегенде 3-5 млрд АҚШ долларын тартуға тиіс. Ал 10 жылдан кейін АХҚО арқылы Қазақстанға 40 млрд долларға жуық қаржы тартылмақ. Бұған жекешелендіру шарасы да өз үлесін қосады деп күтілуде.
