Бүгін, 26 маусымда Алматыдан Ташкентке, Нұр-Сұлтанға, Ақтауға және кері рейстер кешігіп жатқандығы туралы Air Astana хабарлады. Осыған орай әуе тасымалдаушының баспасөз қызметі кешігу себептерін мәлім етті.
"Бүгін, 26 маусымда ұшақтардың бірінің ақаулығына байланысты KS 127/128 Алматы-Ташкент-Алматы, KC 953/954 Алматы-Нұр-Сұлтан-Алматы және KS 859/860 Алматы-Ақтау-Алматы рейстерінің кешігуі күтілуде", – делінген хабарламада.
Клиенттерге рейстер бойынша ақпарат, әуе тасымалдаушының ресми сайтынан бақылап отыру ұсынылған.
"Air Astana" әуе компаниясының жерде қызмет көрсету жөніндегі вице-президенті Александр Небога жағдайға қатысты пікір білдірді.
"Жазғы навигация кезеңінің басталуымен және ковид шектеулерінің алынуымен жолаушылар ағыны өсті. Сол себепті, халықаралық әуежайларда персоналдың, құрал-жабдықтардың тапшылығы ұлғайды. Нәтижесінде, біз әлемнің көптеген авиакомпанияларының уақытылы әрекет ету көрсеткіштерінің төмендегенін көріп отырмыз. Техникалық себептерге байланысты рейстің кешігуі де жағдайды қиындатады", – деді ол.
Компания жолаушылардан келтірілген қолайсыздықтар үшін кешірім сұрады.
