Қазақстандықтарды эвакуациялауға қатысу үшін Украинаға барған Air Astana әуе компаниясының президенті Питер Фостер Киевте қалып қойды. Бұл туралы оның әйелі Татьяна Фостер айтты, деп хабарлайды inbusiness.kz.
Ол күйеуінің Украинаға ұшатынын білмеген, себебі Питер Фостер жұбайына Ақтауға іссапармен кеттім деген.
"Бүгін таңертең Петр маған қоңырау шалып, қарлыққан дауыспен Киевте екенін, бұл ақпаратты менен жасыруға мәжбүр болғанын айтты. Ол қазақстандық азаматтарды барлық мүмкін тәсілмен эвакуациялауға жауапты екенін жеткізді", – деп жазды Татьяна Фостер инстаграмдағы жеке парақшасында.
Питер Фостер мен жердегі қызмет жөніндегі вице-президент Александр Небога екеуі таңғы сағат 5-те Киевті бомбалау басталған кезде Украиндағы Қазақстан елшілігінде болған. Барлық әуежайдың жабылуына байланысты Қазақстан азаматтарын Польшадағы Катовица қаласынан ұшаққа отырғызу туралы шешім қабылданған.
"Эвакуация штабын Польшамен шекараға жақын және Киевтен гөрі қауіпсіз Львовта ұйымдастыру туралы шешім қабылданды. Онда эвакуацияланатын адамдардың тізімі жасалып, қазақстандық паспорты барларға Польшадағы шекарадан өтуге мүмкіндік беретін дәлізді ұйымдастыру бойынша келісім жұмыстары жүргізілуі керек болған", – деді Питер Фостердің әйелі.
Ол бұл жұмысты нәтижелі жүргізу үшін Қазақстанның Украина мен Польшадағы елшілері бар күш-жігерін салып жатқанын атап өтті.
"Күйеуім қайта қоңырау шалды. Мен есеңгіреп қалдым. Киевтен Львовқа жету үшін 3 сағат жол жүргенін айтты. Олар жолды қысқартамыз деп айналма жолға түскен. Бірақ олардың алдынан Киевке бара жатқан ресейлік танктер мен бронетранспортерлер легі шыққан. Бұл жағдай Киевтен 20 шақырым жерде болған. Бұл Украина астанасынан 3 сағаттық жер. Питер Киевке оралуға шешім қабылдаған. Бүгінде ол Александрмен бірге Қазақстан елшілігінде, яғни елшіліктің жертөлесінде отыр. Жақында маңда әскери әуежай үшін шайқас болып жатыр", – деді Татьяна Фостер.
Ол оқиғаның жалғасын ертең айтатынын атап өтті.
