Денсаулық сақтау министрінің бұйрығына сәйкес, Премьер-Министрмен келісім бойынша "Әлеуметтік медициналық сақтандыру қоры" КеАҚ Басқарма төрағасы лауазымына Айдын Құлсейітов тағайындалды, деп жазады inbusiness.kz сайты.
Министрліктің хабарламасына сәйкес, Айдын Құлсейітов Шығыс Қазақстан облысының Өскемен қаласында дүниеге келген.
Ол Шығыс Қазақстан мемлекеттік техникалық университетін "Инженер-экономист" мамандығы бойынша және ҚР Президенті жанындағы Мемлекеттік қызмет академиясын "Мемлекеттік қызмет менеджері" мамандығы бойынша тәмамдаған.
Еңбек жолын жеке секторда басқарушы лауазымдардан бастаған. Кейіннен мемлекеттік қызметке ауысқан. Индустрия және сауда министрлігінде, Энергетика және минералдық ресурстар министрлігінде жұмыс істеді, сондай-ақ "Технологиялық даму жөніндегі ұлттық агенттік" АҚ және "Қазақстандық индустрияны дамыту институты" АҚ Басқарма төрағасы лауазымдарында болды.
2017 жылдан бастап ҚР Президентінің Әкімшілігінде түрлі басшылық қызметтер атқарды. Екі жыл бойы ҚР Президенті Әкімшілігінің Стратегиялық әзірлемелер және талдау орталығын басқарды, содан кейін Стратегиялық жоспарлау бөліміне жетекшілік етті.
Соңғы екі жылда ҚР Президенті Әкімшілігінің Әлеуметтік-экономикалық мониторинг бөлімінің басшысы болды. Сонымен қатар, осы уақытқа дейін Әлеуметтік-экономикалық саясат бөлімінің меңгерушісі қызметін атқарды.
