Оқиға 10 сәуір күні Жайнақ станциясында тіркелген.
Алдын ала мәліметтерге сәйкес, 14 жастағы жасөспірім жүк пойызының үстіне шығып, вагондар арасында секірмек болған. Сол сәтте ол тепе-теңдігін жоғалтып, биіктіктен құлап кеткен.
Белгілі болғандай, жасөспірім жалғыз болмаған – оның жанында тағы бірнеше жасөспірім болған. Қазір олардың барлығы анықталған.
– Кәмелетке толмағандардың жеке басы анықталды. Оқиға салдарынан олардың біреуі дене жарақатын алып, Астана қаласындағы ауруханаға жатқызылды, – деп хабарлады полиция.
Қазіргі уақытта оқиғаның барлық мән-жайы анықталып жатыр. Материалдар кейіннен Астана қаласының құзырлы органдарына жолданады.
Құқық қорғау органдары ата-аналар мен жасөспірімдерді теміржол маңындағы қауіпсіздік ережелерін қатаң сақтауға шақырды.
