Зеренді ауданының прокуратурасы Алексеев каолин кен орны базасында тау-кен байыту комбинатын салып жатқан "Qazaq Kaolin" ЖШС инвесторының құқықтарын қорғады, деп хабарлайды inbusiness.kz сайты.
Жобаның жалпы құны 5,8 млрд теңгені құрайды. Ол жаңа жұмыс орындарын ашуға және өңірдің өнеркәсіптік әлеуетін арттыруға бағытталған.
Прокуратура жүргізген талдау барысында уәкілетті мемлекеттік органның инвесторға қатысты көші-қон заңнамасының сақталуын тексеруді прокуратураның міндетті келісімінсіз және Құқықтық статистика және арнайы есепке алу органдарында тіркемей жүргізгені анықталды.
Қолданыстағы "прокурорлық сүзгі" тетігіне сәйкес инвесторларға қатысты тексеру тағайындау, әкімшілік іс жүргізуді бастау, рұқсат беру немесе шектеу шараларын қолдану, сондай-ақ сотқа талап қою туралы мемлекеттік органдардың шешімдері прокуратурамен міндетті түрде келісілуі тиіс.
Прокурорлық қадағалау актісінің нәтижесінде заңсыз жүргізілген тексеру жарамсыз деп танылып, инвесторға қатысты қозғалған үш әкімшілік іс жүргізу тоқтатылды.
Қазіргі уақытта заң бұзушылыққа жол берген лауазымды тұлғаларды жауапкершілікке тарту мәселесі қарастырылып жатыр.
Прокуратура инвесторлардың құқықтарын қорғау, бизнеске заңсыз әкімшілік қысым көрсетудің алдын алу және инвестициялық жобаларды сүйемелдеу жұмыстарын жалғастырып жатқанын мәлімдеді.
