Бұл туралы Ақмола облысы әкімінің орынбасары Елдос Рамазанов мәлім етті.
"Бүгінгі таңда Ақмола облысы бойынша су тасқыны жағдайы бақылауда. Білім беру және әлеуметтік объектілер штаттық режимде жұмыс істеп жатыр. Жабай, Нұра, Есіл және Колутон өзенінде су арнасынан шығу қаупі сақталып отыр. Тәуекелдің алдын алу үшін өзендердің 64 учаскесінде мұзды жару жұмыстары жүргізіліп жатыр. Облыстың 4 ауданының елді мекендер, сондай-ақ, Астана маңындағы Аршалы, Ерейментау, Целиноград және Шортанды ауданы қамтылды. Көкшетау қаласындағы Қылшақты өзенінің деңгейі кезең-кезеңімен 2 метрге дейін көтерілуі байқалады. Қатерлі деңгейі 1,2 метр, соның салдарынан жағалау бойындағы аумақтарды су басуда", - деді Елдос Рамазанов ОКҚ-де өткен брифингіге ZOOM арқылы қатыса отырып.
Облыс әкімі орынбасарының мәлімдеуінше, Мемлекет басшысының тапсырмасын орындау аясында тұрғындар мен олардың мүлкіне төнген қауіп-қатерді төмендету үшін қосымша шаралар қолданылды.
"Ұзындығы 32 шақырым болатын қорғаныш үймелері тұрғызылды. Оның ішінде Астана маңындағы аймақтарда 16 шақырымнан астам топырақ үйіндісі орнатылды. Су объектілерінің 18 шақырымдық жағалауы нығайтылды. Су тасқынынан келген шығынды есептеу үшін арнайы комиссия құрылды. Келтірілген шығын қысқа мерзім ішінде өтеледі. Қазір Астана су қоймасынан секундына 350 текше метр көлемде су жіберіліп жатыр", - дейді ол.
Айта кетсек, Ақмола облысында су тасқынымен күреске 2,5 мың адам, 1 мыңнан астам техника жұмылдырылды.
