Бүгін таңға жуық Ақмола облысы Атбасар ауданының Хрящевка ауылында жеке тұрғын үйден өрт шығып, 3 бала қайтыс болды, деп хабарлады ІІМ ТЖ комитеті.
Үйде көпбалалы отбасы – 7 адам тұрған: 1979 және 1981 жылдары туған ата – анасы, 5 баласы – 2004, 2005, 2007, 2008 жылдары туған ұлдары мен 2012 жылы туған қыз бала.
"Атбасар қаласының № 4 мамандандырылған өрт сөндіру бөліміне дейінгі арақашықтық 25 шақырымды құрайды. Өрт сөндіру бөлімшелері келгенге дейін ата-анасы мен 2004 және 2012 жылы туған екі бала сынған терезе арқылы өздігінен шықты. Өрт салдарынан үйдің төбе жабыны құлады. Сағат 06:40-та өрт ауыздықталды, сағат 08:25-те сөндірілді, үйінділерді тазалау жұмыстары жүргізілуде. Өрт орнында үш баланың мәйіті табылды",– деп жазылған хабарламада.
Қазір өрттің шығу себебін анықтау үшін жұмыс жүргізіліп жатыр.
