Бұл туралы Қазгидрометтің әлеуметтік желідегі ресми парақшасы жазды, деп хабарлайды inbusiness.kz сайты.
– Жалпы, ақпан айында батыста, солтүстікте, орталықта және шығыста ең қатты аяздар бірінші және екінші онкүндіктерде күтіледі: түнде 21-30 аязға дейін, шығыстың таулы аймақтарында 35 аязға дейін, күндіз 13-20 аязға дейін төмендеуі күтіледі. Бірінші онкүндіктің ортасында және соңында (еліміздің батысында – басында), сондай-ақ екінші және үшінші онкүндіктердің жекелеген күндерінде күндіз жылымық болуы мүмкін, – делінген хабарламада.
Сондай-ақ, республиканың оңтүстік жартысында ақпан бойы түнгі температура 5 градусқа дейін көтеріліп, күндізгі уақытта 8-17 градусқа дейін ауытқуы күтіледі.
Республиканың солтүстік бөлігінде жауын-шашын негізінен қар түрінде, ал оңтүстік-батыста және оңтүстік өңірлерде жаңбыр мен жылбысқы қар түрінде түседі. Тұман, көктайғақ, желдің күшеюі, солтүстікте бұрқасын болуы мүмкін.
