АҚШ ауыл шаруашылығы министрлігі Қазақстандағы бидай өндірісіне байланысты биылғы жылғы (2019 жылдың шілдесі мен 2020 жылдың маусымы) болжамын 11,5 млн тоннадан 11,45 млн тоннаға төмендетті, деп хабарлады Интерфакс-Қазақстан.
Ал бидай экспорты бойынша жасалған болжам сол қалпы 6 млн тонна көрсеткішінде қалды. Бұл ретте импорт 300 мың тоннадан 350 мың тоннаға (16,7%-ға) артады деп күтілуде.
Ал 2020 жылдың 1 шілдесінде қалатын бидай қоры 1,08 млн тоннадан 1,09 млн тоннаға өзгерді.
Бұған дейін еліміздің ауыл шаруашылығы вице-министрі Айдарбек Сапаров 2019 жылы жалпы жиналған егіннің таза салмағы 17,4 млн тонна болғанын хабарлаған. Бұл 2018 жылғы көрсеткіштен 14,3%-ға төмен.
Ал ауыл шаруашылығы министрі 2019 жылы 17 млн тонна астық жиналады деген болжам жасаған еді. Сондай-ақ экспорт көлемі 6-7 млн тонна шамасында болады деп күтілген.
Айта кетерлігі 2018 жылы астықтың бункерлік салмағы 22,8 млн тонна, ал таза салмағы 20,3 млн тонна болған.
