АҚШ AstraZeneca жасап шығарған вакцинаның 60 миллион дозасын басқа елдерге таратады, деп хабарлайды Inbusiness.kz Ақ үйдің коронавируспен күрес жөніндегі бас кеңесшісі Энди Славиттің мәлімдемесіне сілтеме жасап.
Ол препарат партияларының қайда және қашан жіберетінін ашып айтпады. Ескере кететін жайт, елдегі азық-түлік және дәрі-дәрмектер басқармасы АҚШ-та AstraZeneca вакцинасын қолдануға әзірге рұқсат бермей отыр. Құрама Штаттар алдағы бірнеше айда тіпті бұл вакцинаны қолданбауы мүмкін.
Бұған дейін Еуропалық комиссия AstraZeneca компаниясын жеткізілім кестесін бұзғаны үшін сотқа берген еді. Еуропалық комиссия компанияның екіжақты келісімнің кейбір ережелерін орындамағанын, сондықтан орган Еуропалық Одаққа мүше 27 мемлекеттің атынан сотқа жүгінгенін хабарлаған болатын.
Табиғат Нұрболат
