АҚШ Қарулы күштерінің Орталық қолбасшылығы (CENTCOM) Иранның 5 мұнай танкерін жойып жібергенін хабарлады. Бұған дейін Ислам революциясы сақшылар корпусы америкалық әскери кемеге баллистикалық ракетамен екі рет шабуыл жасаған болатын, деп хабарлайды inbusiness.kz сайты DW-ге сілтеме жасап.
АҚШ кемесі өңірлік суларда патрульдеу жұмысын жалғастырды. Шабуыл кезінде жеке құрамнан ешкім зардап шекпеген. CENTCOM баспасөз қызметі тиісті ақпаратты X әлеуметтік желісінде таратты.
CENTCOM Оман шығанағындағы Ислам революциясы сақшылар корпусының M/T Kaviz, M/T Charminar, M/T Horizon 1 және M/T Riesco мұнай танкерлеріне, сондай-ақ Парсы шығанағында M/T Derya танкеріне соққы жасады. Америкалық әскерилер шабуыл жасамас бұрын экипаж мүшелеріне кемелерді тастап кету туралы нұсқау берген. АҚШ-тың мәліметінше, Иран бұл танкерлерді "көлеңкелі" желі аясында пайдаланған.
5 қыркүйекте CENTCOM Иранның үш мұнай танкерін жойған болатын. Бұл қадам сақшылар корпусының америкалық ұшақ тасымалдаушы мен эскадралық миналы кемесіне шабуыл жасау әрекетінен кейін жүзеге асты.
Әлемдік мұнай нарығында маңызға ие Ормуз бұғазы төңірегіндегі дау басылар емес. Ақпан айының соңында АҚШ пен Иран арасындағы қақтығыс басталғанға дейін бұғаз барлық кеме қатынасы үшін ашық болатын. Бүгінде қос тарап бұғазды өз бақылауына алғанын мәлімдеп отыр.
