Америка Құрама Штаттары Газа секторына ұзақ мерзімді негізде Израиль әскерлерін орналастыру туралы өз ұстанымын білдірді, деп жазады inbusiness.kz сайты DW жаңалықтарына сілтеме жасап.
АҚШ Мемлекеттік департаментінің хабарлауынша, Вашингтон ХАМАС-пен қақтығыс аяқталғаннан кейін Израиль әскерлерін Газа секторына тұрақты негізде қайта орналастыруға қарсы.
"Біздің көзқарасымыз бойынша, палестиналықтар барлық шешімдерді өз бетінше қабылдауы керек. Газа секторы – Палестина территориясына жатады және ол сол күйінде қалады", - деді АҚШ Мемлекеттік департаменті баспасөз қызметі басшысының орынбасары Ведант Пател.
Сонымен бірге, Америка Құрама Штаттары 7 қазанда ХАМАС-тың Израильге жасаған шабуылынан кейін Газа секторындағы статус-квоға қайта оралу мүмкін еместігін атап өтті.
"Израиль мен бүкіл аймақ қауіпсіз болып қалуы қажет, ал Газа секторы Израиль халқына және басқа адамдарға қарсы террористік актілер үшін базаға айналмауы тиіс және бола алмайды", - деп қосты Пател.
