ҚР премьер-министрінің орынбасары, Сыртқы істер министрі Мұхтар Тілеуберді Вашингтонға жасаған сапары кезінде Ақ үйде, Конгресте және АҚШ-тың сауда министрлігінде кездесулер өткізді, деп хабарлайды inbusiness.kz.
Кездесу барысында Құрама Штаттардың басшылығы елімізде жүргізіліп жатқан реформаларды қолдайтынын мәлімдеді.
"Сапар барысында министр "Жаңа Қазақстанды" құрудың саяси негізіне айналатын конституциялық реформа жөніндегі жалпыұлттық референдумға ерекше назар аударды. Америкалық тарап мемлекет басшысының реформаларына қолдау білдіріп, олардың имплементациясы республиканың саяси жаңғыруына ықпал ететінін атап өтті", – деп жазылған ҚР ведомствоның хабарламасында.
Министрліктің мәліметінше, сауда министрлігіндегі келіссөздер барысында сауда байланыстарын кеңейту және миссиялармен алмасу жағы талқыланды. "Тараптар санкциялық шектеулер жағдайында қаржы, ауыл шаруашылығы, көлік бағыттарын әртараптандыру саласындағы ынтымақтастықты дамытуға уағдаласты", – деп жазылған ресми мәлімдемеде.
Ескере кететін жайт, АҚШ жалпы инвестиция көлемі ($55 млрд) бойынша еліміздегі ірі шетелдік инвесторлардың бірі болып табылады.
Табиғат Нұрболат
Фото: interkomitet.com
