11 мамырда АҚШ Конгресінің Өкілдер палатасы Украинаға қосымша көмек пакеті ретінде 40 миллиард доллар бөлу туралы заң жобасын мақұлдады, деп хабарлайды inbusiness.kz жергілікті БАҚ-қа сілтеме жасап.
Конгреске қосымша қаржыландыру туралы бұл өтінішті АҚШ президенті Джо Байден жіберген болатын. Бастаманы 368 конгрессмен қолдап дауыс берді, 57-і қарсы болды. Енді заң жобасы Конгресс Сенатының қарауына жіберіледі. Құжат мақұлданған жағдайда ол Байденнің қол қоюына беріледі.
Заң жобасында ресми Киевке әскери, экономикалық және гуманитарлық көмек көрсетуге қаражат бөлу қарастырылған.
9 мамырда Америка Құрама Штаттарының Президенті Джо Байден Украинаға арналған ленд-лиз туралы заңға қол қойды. Украина президенті кеңсесінің басшысы Андрей Ермактың айтуынша, заң 2022 және 2023 жылдарға арналған және АҚШ-тың қорғаныс-өнеркәсіп кешенінің қару-жарағын пайдаланғаны үшін төлемді кейін төлеу немесе қарызға алу туралы үкіметаралық келісім жасасу қарастырылған.
Табиғат Нұрболат
