АҚШ Президенті Джо Байден Конгресске коронавирустық пандемияға байланысты енгізілген төтенше жағдайды ұзарту туралы шешім қабылдағанын хабарлады, деп хабарлайды inbusiness.kz.
"Төтенше жағдайды жалғастыру қажеттілігі бар. COVID-19 пандемиясы ел тұрғындарының денсаулығы мен қауіпсіздігіне айтарлықтай қауіп төндіруді жалғастыруда", – делінген Президенттің Өкілдер палатасының спикеріне және Сенат төрағасына жолдаған хатында.
Байден "елде 900 мыңнан астам адам осы аурудан қайтыс болды және COVID-19-мен күресуді жалғастыру, оған барлық мүмкіндіктерді, соның ішінде федералды үкіметтің мүмкіндіктерін пайдалана отырып жауап беру өте маңызды" деп атап өтті.
Елде COVID-19 пандемиясына байланысты 2020 жылдың наурыз айында жарияланған төтенше жағдай 2022 жылдың 1 наурызынан кейін де күшінде болады. Егер президент оған 90 күн қалғанда Конгреске хабарлама жібермеген болса, режим автоматты түрде жойылуы мүмкін еді.
Джонс Хопкинс университетінің мәліметі бойынша, пандемия басталғалы АҚШ-та аурудың 78,3 миллионнан астам жағдайы анықталды, оның салдарынан 933 749 адам қайтыс болды.
Құралай Құдайберген
