АҚШ билігі Солсбери қаласында бұрынғы барлаушы Сергей Скрипаль мен оның қызына жасалған қастандыққа байланысты Ресейдің 60 дипломатын елден шығаратын болды, деп хабарлайды 24.kz.
Олардың арасында БҰҰ өкілдігінде қызмет ететін 12 адам бар. Бұл туралы Ақ үй өкілі мәлімдеді. Талапқа сай олар ел аумағын 1 аптаның ішінде тастап шығуға тиіс. Бұдан бөлек Канада мен Еуроодақтың 14 елі де осындай шара қолданатынын мәлімдеді.
Еске сала кетейік, 4 наурыз күні Ұлыбританияның Солсбери қаласында Ресей бас барлау басқармасының бұрынғы тыңшысы Сергей Скрипаль мен оның қызына жүйкені зақымдайтын у беру арқылы қастандық жасалған еді. Осыдан кейін Лондон бұған Мәскеудің қатысы бар деп айыптап, Корольдіктен ресейлік 23 дипломаттың кетуін талап етті. Алайда Мәскеу тағылған айыпты жоққа шығарып, көп ұзамай Ұлыбританияның 23 дипломатын "персона нон грата" деп жариялады.
