"Физикалық мүмкіндігім біткенше сөйлей беремін" деген сенатордың неше сағат сөйлегенін Euronews жазады, деп хабарлайды inbusiness.kz сайты.
25 сағат, 5 минутқа созылған аталған рекорд президент Дональд Трамптың радикалды іс-әрекеттеріне демократтардың қарсылығы саналады. Өз үнін естіртудің ерекше әдісін тапқан сөзшең сенаторға демократ әріптестері көмек ретінде сұрақтар қойып отырған. Бұл арқылы Букердің сәл де болса үзіліс алып, тынығуына мүмкіндік сыйлаған.
Осы уақыт аралығанда демократтар Трамптың күн тәртібіне қарсы тұру үшін қолдан келгеннің бәрін жасап жатқанын көрсетуге тырысты.
Букер тәуліктен асқан "баяндамасында" Трамптың кеңесшісі, әлемнің ең бай адамы саналатын Илон Маск құрған Үкіметтің тиімділігі департаментіне қарасты Әлеуметтік қамсыздандыру кеңселерінің қысқартылуына қарсылығын танытты. Ол Трамптың Гренландия мен Канаданы аннексиялауы және жақындап келе жатқан конституциялық дағдарыс туралы да айтқан.
Еске салайық, Сенатта екінші мерзімін атқарып жатқан Букер 5 жыл бұрын, яғни 2020 жылы президенттік сайлауға түсуге тырысқан, десе де пікірсайыстарға қатысу үшін белгіленген шекті орындай алмай, саяси додадан шет қалды.
Бүгінде демократтар көшбасшылардың жаңа буынын іздеп жатыр. Сондай-ақ, олардың жоғарыдағы ескі адамдардан көңілі әбден қалған. Сондай ұрымтал шақта Букердің сөзі оның партиядағы жетекші тұлға ретіндегі мәртебесін нығайта түсуі ықтимал.
Сейсенбі күнгі Сенаттың YouTube парақшасы мен басқа да тікелей эфирлерде Букердің сөзін он мыңдаған адам көрген. Кори Букерді қолдау үшін Капитолийге шағын топ та жиналыпты.
