АҚШ-та алаяқтықпен айналысқан 25 адамнан тұратын топ әшкереленді. Топта Қазақстанның үш азаматы болған. Бұл туралы АҚШ-тың әділет министрлігі хабарлаған, деп жазады sputniknews.kz.
Нью-Йорктің Оңтүстік округы прокуратурасының мәліметіне сүйенсек, қылмыстық топ құрамында Ресейдің жеті азаматы, Грузияның бес азаматы, төрт Әзербайжан азаматы, үш қазақстандық, екі латвиялық, екі украин азаматы болған. Сондай-ақ айыпталғандар қатарында АҚШ пен Түркия азаматтары да бар. Сейсенбі күні Нью-Йоркте осы іс бойынша 11 адам ұсталды, тағы біразы Флорида мен Мичиганда қолға түсті, сегіз адам іздеуде жүр, оның алтауы - ресейлік.
Оларға тағылған айыптар бойынша, ҰҚТ көлік сату туралы жалған хабарландырулар таратып, адамдардан кепіл ақша алып, ізін суытып отырған. Осы мақсатта бірнеше жалған фирма ашып қойыпты. Тұтынушылардың шығыны шамамен - 4,5 миллион АҚШ доллары.
ҰҚТ мүшелерінің әрқайсысына алаяқтық мақсатында өзара сыбайласу айыбы тағылған – ол үшін 30 жылға дейін түрмеге отыруы мүмкін. Сонымен бірге, ақшаны жылыстату мақсатында сыбайласу айыбы бойынша 20 жылға сотталуы ықтимал.
