АҚШ президенті Джо Байден жергілікті билік елдің барлық тұрғындарын COVID-19 дертіне қарсы вакцинаны ектіруге міндеттей алатынын мәлім етті, деп хабарлайды Inbusiness.kz америкалық БАҚ-қа сілтеме жасап.
Ақ үй басшысы өз сөзінде жергілікті билік те, жергілікті кәсіпорындар да өз қызметкерлеріне осындай талап қоя алатынын жеткізді. Президент бұл мәселені Әділет министрлігінің өкілдерімен талқылағанын айтты.
Сондай-ақ Байден күзде вакциналар америкалық реттеушінің мақұлдауына толықтай ие болатынын жариялады.
Еске сала кетсек, бұған дейін Америка Құрама Штаттарының әкімшілігі мемлекеттік қызметкерлерді коронавирусқа қарсы вакцина қабылдауға міндеттеген еді. Егер қызметкер екпе салдырмаса, ол жұмыста маска киюге, басқа қызметкерлер мен келушілерден алшақ жүріп, әлеуметтік қашықтық сақтауға міндеттеледі және іссапарларға бара алмайды.
Сонымен қатар америкалық әскери қызметкерлер COVID-19 екпесін салдыруы тиіс.
Табиғат Нұрболат
