АҚШ 12 мамырдан бастап елге әуе рейстерімен келетін шетелдік азаматтар үшін міндетті коронавирустық вакцинация туралы талапты алып тастады, деп хабарлайды inbusiness.kz DW-ға сілтеме жасап.
"Біз әкімшілік 11 мамырдан кейін федералды ведомстволардың қызметкерлері, федералды келісімшарт бойынша жұмысшылар мен халықаралық әуе рейстерімен келетін жолаушылар үшін міндетті COVID-19 вакцинациясы туралы талапты алып тастайтынын жариялаймыз", - делінген Ақ үйдің 11 мамыр, бейсенбіде жарияланған мәлімдемесінде.
АҚШ билігі елге келген шетелдіктерден 2021 жылдың қараша айынан бастап COVID-19 вакцинасы салынғанына дәлел болатын құжаттарды ұсынуды талап ете бастаған болатын. Тағы бір талап - АҚШ медициналық реттеушісі немесе Дүниежүзілік денсаулық сақтау ұйымы (ДДҰ) мақұлдаған вакциналар ғана қабылданды.
