Ереуілге шыққан ақтаулық аула сыпырушыларға жалақы төленді. Бұл туралы қала әкімінің орынбасары Жангелді Әубәкіров айтты, деп хабарлайды astanatv.kz.
Оның айтуынша айлық беру үшін жергілікті жобаларды жүзеге асыруға республикалық бюджеттен бөлінген қаражаттан 74 млн теңге алуға тура келген. Атқамінерлер қазынаның ақшасын енді қала бюджетіне ақша түскен соң, 1,5 айдан кейін қайта орнына қоймақшы. Ал, "Қала жолдары" мекемесінің ақпан, наурыз айларында адамдарға жалақы төлеу үшін банктен алған несиесін шенеуніктер бір аптадан соң қайтаруға уәде етті.
Еске салсақ, Ақтау қаласында 400-ден астам көше тазалығына жауапты жұмысшылар айлық төленбегендіктен наразылық білдіріп, жұмысқа шықпай қойған еді.
"Жергілікті бюджетке ақша түсісімен кеміген соманы қалпына келтіреміз. 1-1,5 ай күте тұратын болып келістік. Өйткені, бұл қаржы жұмысшылардың жалақысын төлеуге арналмаған. Алайда адамдардың жағдайын түсініп, осындай әрекетке баруға мәжбүрміз", – деді Жангелді Әубәкіров.
