"Ақтау – түркі әлемінің мәдени астанасы" мерекесіне орай өткен концертті 100-ден астам бала мен жасөспірім ата-анасынан көз жазып қалған, деп жазады inbusiness.kz сайты.
Концерт кезінде адам көп болған. Сол себепті кейбір балалар мен ересектер өзін жайсыз сезініп, есінен тана жаздаған. Ұлттық ұлан мен арнайы жасақ оларды қолдарына көтеріп, қауіпсіз жерге шығарып жатты. Кейбіреулерге медициналық көмек қажет болған.
Сонымен қатар, бірнеше бала уақытша ата-анасынан адасып қалған. 100-ден астам бала арнайы дайындалған киіз үйге жеткізіліп, сол жерде шара ұйымдастырушылары оларды уақытша қарап, кейін ата-аналарына табыстаған.
"Ең үлкен бала – 15 жаста, ең кішкентайы – арбада отырған сәбиге дейін болды. Қазір бәрі аман-есен ата-анасына қайтарылды. Сахнадан бірнеше рет ескертіліп, баласы жоғалған ата-аналар киіз үйге бару керектігі айтылды. Мұндай жағдайлар қоғамдық шараларда жиі болады", – деді Маңғыстау облыстық Полиция департаментінің баспасөз қызметі.
