“Санитарлық-эпидемиологиялық бақылау басқармасына ішек инфекциясы мен гастроэнтерит ауруының топтық жағдайы туралы шұғыл хабарлама келіп түсті. 16 адам стационарға көмек сұрады, оның 10-ы ауруханаға жатқызылды. Қазіргі уақытта басқарма мамандары аурудың көзін анықтау үшін эпидемиологиялық тергеу жүргізуде”, - деп хабарлады ведомстводан.
Бұл ретте санитарлық-эпидемиологиялық бақылау басқармасында улану орын алған мейрамхананың атауын айтудан бас тартылды.
Естеріңізге сала кетейік, бұған дейін Ақтауда ауызашардан кейін дәрігерлердің жаппай улануы орын алғаны хабарланған болатын.
Ақтау әкімдігінің баспасөз қызметі ақпаратты растады. Олардың деректері бойынша, 10 сәуірде қаланың мейрамханаларының бірінде ауызашар өткізіліп, оған аудандар мен қаланың медициналық мекемелерінен дәрігерлер шақырылды. Мерекеге барлығы 50 адам қатысты. Олардың ішінде улану белгілері бар 16 адам ауруханаға жүгінді.
