Ақтауда қазақ-неміс инжиниринг институты ашылады. Бұл туралы Президент Қасым-Жомарт Тоқаев айтты.
Мемлекет басшысы Германия Президентіне елімізге арнайы сапармен келгені үшін ризашылығын білдірді.
"Бұл сапар екі ел арасындағы ынтымақтастықты дамытуға тың серпін беретіні сөзсіз. Біз бүгін Германия Президенті Франк-Вальтер Штайнмайер мырзамен келіссөздер жүргіздік. Екіжақты байланыстарды нығайту жолдарын талқыладық. Сондай-ақ өзекті халықаралық мәселелер жөнінде пікір алмастық. Биыл Қазақстан мен Германия арасында дипломатиялық қатынас орнағанына 31 жыл толды. Осы уақыт ішінде жоғары деңгейдегі саяси диалог қалыптасты. Өзара тиімді сауда-экономикалық және инвестициялық ынтымақтастық қарқынды дамуда. Мәдени-гуманитарлық байланыстардың аясы кеңейді. Серіктестікті жандандыру үшін әлеуетіміз мол екенін атап өткім келеді. Атап айтқанда, Маңғыстаудағы жасыл сутегін өндіруге арналған бірлескен жобаның маңызы зор", - деді ол Ақордада өткен баспасөз мәслихатында.
Президенттің айтуынша, немістің озық технологиясы мен тәжірибесі негізінде кәсіби мамандар дайындау қажет.
"Ақтауда қазақ-неміс инжиниринг институты ашылады. Бұл жобалар екі елдің студенттері мен мамандары арасында тәжірибе алмасуға жол ашады. Экономиканы, өндіріс саласын білікті кадрлармен қатамасыз етуге мүмкіндік береді", - деді Мемлекет басшысы.
