Ақтау қаласында "Сұлтан", "Аққала" және "Мұрагер" көпқабатты тұрғын үйлер құрылысы кезінде аса ірі көлемдегі алаяқтық фактісі бойынша айыптау үкімі шықты. Аталған істі Қаржылық мониторинг агенттігінің Маңғыстау облысы бойынша департаменті жүргізді, деп жазады inbusiness.kz сайты.
"Тергеу барысында "ИнтерьерСтройАқтау" ЖШС басшыларының құрылыс жүргізуге рұқсат құжаттары, лицензиясы және жобалық-сметалық құжаттамасы болмағанына қарамастан, 590 үлестік қатысу келісімшартын жасасқаны анықталды.
Нәтижесінде үлескерлерден заңсыз түрде 5,5 млрд теңгеден астам қаражат тартылған", - делінген ҚР ҚМА Маңғыстау облысы бойынша департаменті таратқан ақпаратта.
Сонымен бірге құрылыс жұмыстары талапқа сай жүргізілмеген және белгіленген мерзімде аяқталмаған.
1,9 млрд теңге көлеміндегі қаражат жалған құрылыс актілері арқылы қолма-қол ақша ретінде кассадан шығарылып, компания басшылығы тарапынан иемделген.
Тергеу барысында 5 жер телімі мен 47 автокөлікке тыйым салынды.
Сондай-ақ, салымшылардың талаптарын өтеу мақсатында 1,1 млрд теңге көлеміндегі мүлік тәркіленіп, өтем ретінде аударылған.
