Орталық іске қосылғанда 80% өнім сырттан тасымалданатын өңірде азық-түлік тапшылығы болмайды әрі бағаның шарықтауына тоқтам болады деген жоспар бар.
Қазіргі таңда 2 мың шаршы метр аумаққа павильондар салынып жатыр. Онда шаруалар өз өнімдерін делдалсыз және жалға алу төлемін жасамай-ақ сата алады. Бұл өз кезегінде тұтынушылар үшін бағаны тұрақтандыруға оң әсер етеді.
"Құрылыс жоба бойынша кезең-кезеңімен іске асырылып жатыр. Қазір жұмыстың үштен бірі бітті. Жобада жеміс-жидек, көкөніс және құрғақ тамақ өнімдерін сақтайтын қойма болады. Сонымен қатар мультикамералы тоңазытқыштар қарастырылған. Жобаның көздеген мақсаты – мейрамханалар, азық-түлік дүкендері, басқа да бизнес субъектілерінде азық-түлік қауіпсіздігін қамтамасыз ету. Қала тұрғындарына ешқандай делдалсыз, нарықтағы бағадан төмен азық-түлік алуына жағдай жасау", – деді мердігер Бекзат Жеткізгенов.
Сауда алаңы және қойма көлемі 40 000 шаршы метр болады. Көтерме-тарату орталығы 2023 жылы іске қосылады деп жоспарлануда.
Тасым Жаңай
