Маңғыстау облысында карантин режимі бүгіннен бастап екі апта уақытқа қатайтылды. Соған қарамастан, Ақтау қаласында болған жаназаға жүзден аса адам жиналған. Белгілі болғандай, қайтыс болған кісі – облыстың бұрынғы бас полицейі Мақсұтхан Әбләзімовтің анасы. Қазіргі күні ақтық шара рәсімінің видеосы әлеуметтік желілерде кеңінен тарауда. Сонымен қатар, 79 жасында көз жұмған Бибіжамал Әбләзімованың жан-жағына жасаған жақсылығы көп, көпке қадірлі адам болғандығы да айтылып жатыр.
Сондай-ақ, бұл туралы өзінің Telegram-каналында Қазақстан премьер-министрінің штаттан тыс кеңесшісі Ербол Еділов те жазды.
"Полиция генерал-майоры, Батыс Қазақстан облысы полиция департаментінің басшысы Мақсұтхан Әбләзімов пен бизнесмен Бахаридин Әбләзімовтің анасы Бибіжамал Әбләзімова 79 жасында өмірден озды", – деп хабарлады.
Ал полиция қала ортасында адамдардың көптеп жиналуына байланысты ешқандай түсініктеме берген жоқ.
Құралай Қуатова
