Мойын омыртқасы сынып, жұлыны зақымданған 39 жастағы азаматқа операцияны арнайы Астанадан келген Ұлттық нейрохирургия орталығының мамандары жасап шықты,- деп хабарлайды inbisness.kz тілшісі.
Дәрігерлер ер адамға алған жарақаты салдарынан "сал ауруына ұшырады" деген диагноз қойды.
"Омыртқа толығымен имплантпен ауыстырылды. Жұлынды қысып тұрған омыртқаның сүйек құрылымдары алынып тасталды. Осылайша жұлын қысымнан босатылды. Науқастың операциядан кейінгі жағдайы тұрақты ауыр. Қазір науқас реанимацияда жатыр", - деді облыстық аурухананың нейрохирургия бөлімшесінің меңгерушісі Думан Мырзабеков.
Дәрігерлер жақын арада науқасты бөлімшеге ауыстыру жоспарланып отырғанын айтты.
Естеріңізге сала кетейік, Ақтауда 11 шағын аудан, №41 үйдің жанында өтіп бара жатқан адамның үстіне жоғары қабаттан диван лақтырылған болатын. Салдарынан ер адам ауыр жарақат алып, есінен айрылды. Бұл дерек бойынша ҚР Қылмыстық кодексінің 114-бабы денсаулыққа абайсызда зиян келтіру бойынша сотқа дейінгі тергеп-тексеру жүргізілуде.
