24 және 33 жастағы азаматтар ауруханаға жеткізілген еді. Бірінің денесін 70%, ал екіншісінің 60% күйік шалған. Олардың беті, кеуде тұсы мен екі қол-аяғын өрт шалған. Тыныс алу мүшелері де зақымданған, деп хабарлайды inbusiness.kz тілшісі.
“Екеуіне де 2-3 дәрежелі күйік деген диагноз қойдық. Екі науқас та жансақтау бөлімінде жатыр. Аппарат арқылы демалады. Жағдайлары өте ауыр. Телемедицина арқылы Алматы, Астанадан консультация аламыз”,- дейді облыстық аурухананың дәрігері Самалбек Жұмағұлов.
Айта кетейік, өрт кеше сағат 21:40-та 28А шағын ауданындағы дөңгелек жөндеу орталығында болған. Құтқарушылар 42 шаршы метр аумақта автомобиль дөңгелектерінің өртенгенін анықтады. Қызыл жалынды ауыздықтауға жеке құрамның 12 адамы және 3 техника жұмылдырылды. Өрт сөндірушілер көлемі 40 литр болатын екі газ баллонын сыртқа шығарды. Өрттің шығу себебі анықталып жатыр.
