Симба есімді арыстан Алматы зообағына 16 шілдеде кешке қарай жеткізіледі. Бұл туралы ҚР Экология, геология және табиғи ресурстар министрлігінің орман шаруашылығы жануарлар дүниесі комитетінің баспасөз хатшысы Сәкен Ділдахмет өзінің Facebook-тегі парақшасында мәлім етті.
Алматы зообағының Instagram-дағы парақшасында Симбаны медициналық тексеруден өткізіп, оны арнайы торға қамап жатқаны түсірілген видео жүктелді. Мамандардың айтуынша, арыстанға ұшардың алдында анестезия жасалған екен. Жануардың денесінен бірнеше жарақат болғанымен, оның жағдайы қанағаттандырарлық.
Еске сала кетсек, 25 маусымда Ақшүкір елдімекенінде емін-еркін жүрген арыстанның видеосы желіде тарап кетті. Инспекторлар көп ұзамай оны қолға түсірген. Жануардың Мәскеу циркіне тиесілі еместігі белгілі болып, оның қожайыны табылды. Кейін сот Симбаның иесіне қатысты үкім шығарған болатын.
Табиғат Нұрболат
