Айта кетейік, облыс әкімдігінің бюджет қаражатына қолшатыр сатып алатыны жөнінде мемлекеттік сатып алу сайтына жариялаған екі лоты түсініспестік туғызған болатын. Олардың 20 үлкен және 30 шағын көлемде, қара түсті болуы, ұстайтын жері таза ағаштан жасалған болуы керек екендігі көрсетілген еді. Ұсыныс 428 571,60 теңгеге бағаланып, нәтижесінде 195 мың 570 теңгеге сатып алынады. Сондай-ақ бұған дейін қолшатырлар бойынша қойылған сауалға өңір басшысы Оңдасын Оразалин "бұл мәселеден хабарсыз" екенін айтып, жауап берген еді.
Мән-жайды түсіндірген облыстық әкімдіктің іс басқармасы басшысының міндетін атқарушы Мейрам Әуелбековтің айтуынша, қолшатырлар ауа райы қолайсыз, жауынды-шашынды күндері келіп қалған "ішкі және халықаралық кездесулердегі" ресми делегация мүшелеріне арналған. Белгілі болғандай, қолшатырлар әрбір үш жыл сайын сатып алынады, ал бұған дейінгілері сынып, жарамсыз болып қалған.
"Келген адамдар тек ғимараттың ішінде жүрмейді ғой, нысандарды аралайды, егіс басына барады", – деп түсіндірді Мейрам Әуелбеков.
Құралай Қуатова
