Ақтөбеде тұрғын үйлерді сапасыз салу бойынша қылмыстық іс сотқа жолданды, деп хабарлайды inbusiness.kz сайты облыстық прокуратураға сілтеме жасап.
Ақтөбе облысының прокуратурасы Қылмыстық кодекстің 190-бабының 4-бөлігінің 2-тармағы, 278-бабының 2-бөлігі және 280-бабының 1-бөлігімен (алаяқтық, сапасыз салынған құрылыс және сараптамалық жұмыстарды немесе инжинирингтiк қызметтер көрсетуді тиісінше орындамау) сотқа дейінгі тергеп-тексеруді аяқтады.
"2018 жылы Ақтөбе құрылыс басқармасы мен "Машат" ЖШС-гі арасында Ақтөбе қаласында жалпы сомасы 337 миллион теңгеден астам 24 пәтерлік екі тұрғын үйдің құрылысына келісімдер жасалған. Тұрғын үйлердің құрылысы кейіннен қосалқы мердігер "Агро-Сервис" ЖШС-не берілген", — делінген хабарламада.
Көппәтерлі тұрғын үйлер 2019 жылдың қазан айында пайдалануға берілген.
"Алайда құрылыс аяқталғаннан кейін үйлердің іргетасында әртүрлі деформациялар (жарықтар) пайда болған. Мамандардың қорытындысына сәйкес, үйлер апатты жағдайда, пайдалануға жарамсыз және бұзуға ұсынылған. Іргетас бетон блоктарының техникалық сипаттамалары ГОСТ талаптарына сәйкес келмейді. Жиналған дәлелдемелердің негізінде күдіктілерге қатысты "үйқамақ", сондай-ақ "кепіл" түріндегі бұлтартпау шаралары таңдалды", - деп хабарлады прокуратурадан.
Қазіргі уақытта облыс прокуратурасымен төрт күдіктіге қатысты қылмыстық іс мәні бойынша қарау үшін, Ақтөбе қаласының № 2 сотына жолданды.
