Зиянкестерге қарсы шараны пысықтаған облыс әкімі Оңдасын Оразалин жауапты тұлғаларға: "Саябақтарды, гүл бақтарын, тұрғын үй алаптарын, орман және шаруа қожалықтарын өңдеңіздер", – деп тапсырма берді.
Ауыл шаруашылығы басқармасының басшысы Исатай Еспағамбетовтың сөзінше, шалғынды көбелектің жаппай өршуі 8-10 жыл аралығында қайталанады. Елдің батыс өңірлерінде зиянкестер 3 ұрпаққа дейін көбейе береді.
"7 тамыздан бері шалғын көбелегінің үшінші ұрпағы жаппай көбейіп жатыр. Жұлдызқұрттың пайда болу кезеңі тамыз айының соңы, қыркүйек айының басы болу мүмкін", – деді басқарма басшысы.
Оның сөзінше, ауыл шаруашылығы өнімін өндіретін субъектілер зиянкестерге қарсы химиялық өңдеуді өз қаражаты есебінен жүргізуге міндетті.
"Зиянкестерге қарсы инсектицидтерді қолданған ауыл шаруашылығы саласының өкілдеріне дәрі-дәрмектің 50%-ға дейін төмендетілген құнына субсидия беріледі", – деді Исатай Еспағамбетов.
Қанат Махамбет
