Мәселен, Артур Жаңбыршы компанияға пәтер құнының 90 пайызын төлеп қойған. Келісім бойынша, үй кілті қолына 2022 жылдың көктемінде тиюі керек еді. Алайда, мердігер мекеменің жауапсыздығынан әлі күнге дейін құрылыс аяқталмай тұр. Жиналған қаржы 1 миллиард, 800 миллион теңгеге дейін жеткен, деп жазады inbusiness.kz сайтының тілшісі.
Шағым айтушылар бұл қаржыға бір емес, екі үй салуға болар еді деген пікірде.
"Мен екі бөлмелі пәтердің ақшасын толықтай төлеп қойдым. Үлескерлер қажетті қаржының 90%-ын салды. Алайда, бізде компания ақшаны басқа жаққа салды деген күдік бар. Өйткені, біз мердігердің басқа жерден тағы бір жер учаскесін алғанын біліп отырмыз", - дейді Артур Жаңбыршы.
Ал, шаһар басшылығының мәліметінше, Ақтөбеде құрылысы аяқталмаған осындай 11 нысан бар. Өз міндеттемелерін орындамаған құрылыс компаниялары жауапқа тартылған. Қазірге дейін олардың үшеуінің ісі сотқа жіберілсе, басқаларына қатысты тергеу амалдары жалғасып жатыр. Үлескерлер мәселесін шешу үшін облыс орталығынан жаңа мекеме де құрылды.
"Үлескерлер мәселесін көп ұзамай шешуге кірісеміз. Оған дейін мониторинг, тізім жасау жұмыстары жүреді. 511 пәтерге қатысты 540 үлескер бар. Олардың барлығы Ақтөбе облысынан. Алдын ала есеп бойынша, шығын 3,5 миллиард теңге. Алты нысанның құрылысы демеушілік көмекпен жалғасып жатыр. Басқаларына сот шешімінен кейін техникалық зерттеу жасалып, жоба дайындалады", - деп айтып өтті жұмысын енді ғана бастаған "Ақтөбе құрылыс компаниясы" серіктестігінің директоры Нағымжан Алдияров.
Компания басшысының айтуынша, үлескерлер мәселесін шешу үшін жаңа мекеме құру тәжірибесі Алматы, Астана секілді үлкен қалаларда бұрыннан бар. Серіктестікке 15 маман жұмысқа алынған. Олардың көбі үлескерлерге құжат рәсімдеу және заңдық көмек көрсету бойынша қызмет көрсетеді.
