Ақтөбе облысында мас күйінде көлік басқарған үш баланың анасы темір торға қамалды, деп хабарлайды inbusiness.kz сайты "Диапазон" басылымына сілтеме жасап.
"Полицейлер қала көшелерінен қозғалысы күдік тудырған көлікті байқады, көлікті тоқтатып тексеріс жүргізу барысында 51 жастағы мас әйел анықталды. Медициналық сараптама оның көлікті жеңіл мас күйінде басқарғанын көрсетті", - деп хабарлады облыстық полиция департаменті.
Айта кетейік, ол 2021 жылдың мамыр айында мас күйінде көлік жүргізгені үшін сот шешімімен 3 жылға жүргізуші куәлігінен айырылған.
Жазаға және кәмелетке толмаған үш баласының болуына қарамастан, ол тағы да мас күйінде рөлге отырды. Автоледи уақытша ұстау изоляторына жіберілді.
Қылмыстық кодекстің 346-бабының 1-бөлігі бойынша сотқа дейінгі тергеу амалдары жүргізілуде. Ол 5 жылға дейін бас бостандығынан айырылуы және өмір бойына жүргізуші куәлігінен айырылуы мүмкін.
