Сыбайлас жемқорлыққа қарсы күрес агенттігінің алдын алу деапртаментінің басшысы Анар Жарова еліміздің кеден саласындағы негізгі жемқорлық тәуекелдерін атады, деп хабарлайды ҚазАқпарат.
"Осы жылдың маусым айында агенттік кеден саласындағы жемқорлық тәуекелдеріне талдау жүргізіп көрген болатын. Талдау барысында біршама жемқорлық тәуекелдері анықталды. Олардың ішіндегі негізгісі ретінде келесіні атап өтуге болады: біріншісі – тауарларды уақытша сақтау қоймаларында сақталған тауарларды жою бағытында кеден органдары қызметкерлерінің уақтылы жұмыс жүргізбеуі", – деді Анар Жарова агенттікте өткен жиында.
Департамент басшысының айтуына қарағанда, осы мәселенің кеселінен қойма иелері шығынға ұшырап жатады.
"Осының салдарынан қойма иелері ұсталған тауарлардың сақталуына байланысты қаржылық шығынға ұшырайды. Ұсталған тауарлардың сақтау мерзіміне қарамастан (4 ай) тауарлар жылдап қоймаларда жата береді. Мәселен, Ақтөбе облысында ұсталған тауарлар қоймаларда 2005 жылдан бері жатыр. Сол секілді Алматы облысында 2008 жылдан бері жатқан тауарлар бар", – деді спикер.
Анар Жарованың түсіндіруінше, қоймалардың тауарлардың сақталуына иелері жауапты. Кәсіпкердің шамасы келмеген жағдайда, қоймаларда тауарлар бюджет есебінен сақталады.
"Алайда іс жүзінде бюджет есебінен тауарды қайтару жағдайы тіркелген емес. Себебі, кеден органдарынан бұл бағытта қаражат бөлінбейді", – деді Анар Жарова.
