"Ақтөбе рельс-арқалық зауыты" ЖШС "Солтүстік – Оңтүстік" теміржол учаскесінің құрылысы үшін Ауғанстанға 350 мың тонна рельс жеткізуге жарияланған тендерде ұтып шықты. Бұл туралы Қазақстанның СІМ басшысы Бейбіт Атамқұлов айтты, деп хабарлайды Интерфакс – Қазақстан.
"Ауғанстанда бейбіт жолмен қалпына келтіру және көлік-инфрақұрылымдық желілерді жаңғырту процесі жүріп жатыр. Қазіргі таңда "Солтүстік – Оңтүстік" темір жолының құрылысы жүріп жатыр. Қазақстандық "Интегра" компаниясы Хаф – Герат учаскесінің 43 километріне жарияланған тендерді ұтып алды. Сонымен қатар, қазақстандық "Ақтөбе рельс – арқалық зауыты" осы темір жол құрылысы үшін Ауғанстанға 350 мың тонна рельс жеткізуге конкурсты жеңіп алды", – деді Бейбіт Атамқұлов.
Айта кетсек, "Ақтөбе рельс-арқалық зауыты" ЖШС 2014 жылдың соңында пайдалануға берілді. Зауытты "Қазақстан темір жолы" ҰҚ (ҚТЖ) жеке инвесторлармен бірлесіп салды.
