Ақтөбеде жылу бағасы күрт қымбаттауы мүмкін, деп хабарлайды khabar.kz.
Өндіруші компания монополияға қарсы департаментіне тарифті 82%-ға өсіру туралы өтініш берген. Осыған байланысты өңірде қоғамдық тыңдау өтуде.
Қазіргі таңда 1 гигакалорий жылудың құны – 1 911 теңге. Егер құзырлы орган монополистердің өтінішін қолдаса, бірден 3 510 теңгеге дейін көтеріледі.
Бұған дейін белгілі болғандай, жылуды халыққа жеткізуші мекеме келер жылдан бастап өз қызметтері үшін 10%-ға жоғары ақы алады.
Монополист мекеме: "бағаны көтеруге қазандықтардың тозғаны басты себеп", – дейді. Оларды жаңартуға 10 млрд 800 млн теңге қаражат қажет.
"Негіздемеміз бар. Қолданыстағы барлық қазандықтар әбден ескіріп, қызмет көрсету мерзімі таусылды. Алдағы 1-2 жылда тіптен істен шығуы мүмкін. Оларды жаңартпаса, жылу өндіру тіптен мүмкін болмайды. Сондықтан осындай қадамға баруға мәжбүрміз", - дейді "Ақтөбе ЖЭО" АҚ басқарма төрағасының орынбасары Рақым Мұхаммедқалиев.
