Еңбекші ауылына газ құбырларын тарту жұмыстарына Ақтөбе облыстық энергетика және тұрғын үй-коммуналдық шаруашылығы басқармасы тапсырыс берген.
Мердігермен келісімшарт 2022 жылдың ақпанында жасалып, құрылыс жұмыстары мамыр айында басталған. Ол үшін қазынадан 385 млн теңге бөлінген. Ауылға газ келетінін естіген жұрт жаппай үйіндегі пешті бұза бастайды. Себебі, шенеуніктер биыл тамызда үйге көгілдір отын кіреді деп уәде берген.
"Газ құбырын негізі 19 км жерге тарту керек еді, соның 7-ақ шақырымына ғана құбыр түсіп тұр. Қалған жер қазылған күйі әлі жатыр, әлі труба таба алмай жүр. Бұл мәселені облыс басшысына да жеткіздім. Үш рет жолықтым. Басқарма басшысына тапсырма берді. Ол тамыз айының аяғында толық тапсырам деген еді. Қазір айдың ортасына келдік, мынадай жұмыстармен биыл бітпей қала ма деп қауіптеніп отырмыз",- дейді ауыл тұрғыны Сайын Боранқұлов.
Ақтөбе облыстық әкімдігіндегілер Еңбекші ауылына газ да су да қазан-қараша айында келеді деп отыр.
- Нысанның нормативті құрылыс мерізімі 8 ай екенін ескерсек, қыс айларында талап бойынша жұмыс уақытша тоқтатылды. Бұл- ауыспалы нысан. Келісім-шарт бойынша биыл жылдың аяғында аяқталуы тиіс. Мердігер мекеме 5,2 шақырым жеткізуші газ құбырын тартылған болатын. Ақтау қаласынан тағы 2 км келуде және Ақтөбеден 3 км газ құбыры тасымалдану жоспарлануда. Газ құбырын қазан-қараша айында іске қосу жоспарлап отырмыз",- деді Ақтөбе облыстық энергетика және тұрғын үй-коммуналдық шаруашылығы басқармасы басшысының орынбасары Нұртай Сертаев.
Ауылды ауыз сумен қамту үшін Темір аудандық әкімдігі 290 млн теңге қаражат бөлген. Ол жұмыстар да жылдың соңында аяқталады.
