Ақтөбелік экологтар өзен арналарына тазарту жұмыстарын жасаған төрт мердігер компанияның заңсыз әрекеттерін әшкереледі, деп хабарлайды Aktobenews.kz.
Олар қаладағы 8 өзеннің жағасын тазалауды өткен жылы бастап кеткен болатын.
"Өзен арналарын тазалауға қатысты мердігер компаниялар жұмысына облыстық прокуратура сараптама жасады. Нәтижесінде мердігер компания экологиялық рұқсат қағаздарын алмағаны анықталды. Осыған қатысты тиісті шаралар қолданылып жатыр. Компаниялардың әрқайсысына 50 АЕК көлемінде айыппұл салынады. Сонымен қатар, қоршаған ортаға келтірген зияны үшін әрқайсысынан 30 миллион теңге төлеттіруге нұсқама беріледі", – дейді облыстық экология департаменті басшысының орынбасары Ерболат Қожықов.
Президент Қасым-Жомарт Тоқаевтың өзі Қазақстанның бас экологына Ақтөбедегі жағдайды қалыпқа келтіруді тапсырды. Экология министрі Мағзұм Мырзағалиевтің өңірге сапарынан кейін жергілікті экологтардың жұмысы жанданды.
