Ақтөбе облысының Мұғалжар ауданында мал ұрлығымен айналысқан 6 адамнан тұратын қылмыстық топ құрықталды. Олар ұрланған малды Ақтөбе және Қандыағаш қалаларының базарларында сатқан, деп жазды inbusiness.kz.
"Құрамында 6 адам бар қылмыстық топ ұсталды. Қазіргі уақытта аталған қылмыстық топтың Мұғалжар ауданы аумағында мал ұрлығының 5 дерегіне қатыстылығы дәлелденді. Күдіктілердің облыс аумағында мал ұрлығын жасауға қатыстылығы тексерілуде", - деп хабарлады облыстық полиция департаментінің бастығы Атығай Арыстанов.
Қылмыстық топты қолды болған төрт түліктің кезекті партиясын өткізу кезінде Мұғалжар аудандық полиция бөлімшесінің қызметкерлері құрықтаған, сөйтіп, оқиға орнында 6 бас ірі қара және "ГАЗель" автокөлігі тәркіленеді. Аталған факті бойынша ҚК-нің 188-1-бабының 2-бөлігі бойынша сотқа дейінгі тергеу жүргізіліп, күдіктілер қамалған. Олардың кінәсі дәлелденген жағдайда үш жылға бас бостандығынан айырылмақ.
Құралай Қуатова
