Бұған дейін хабарлама алған студенттер оқуын жалғастыра алады. Ал бүгін түсте өңірге Ғылым және жоғары білім министрлігі Жоғарғы және жоғары оқу орнынан кейінгі білім комитеті төрағасының орынбасары Ақерке Абылайхан барып, тексерудің алғашқы қорытындыларын жариялады.
"Бұл – жекеменшік университет. Алайда ол елдің заңдарына сәйкес жұмыс істейді. Біріншіден, оқудан шығару туралы бұйрық 2025 жылдың 18 наурызы күні шыққан. Министрліктің бұйрығына сәйкес, егер студент оқудан шығарылса, оның жоғары білім платформасындағы статусында өзгеріс болуы тиіс. Алайда бұл өзгеріс жасалмаған, яғни бәрі де студент болып саналады. Екіншіден, шығарылған бұйрық тек орыс тілінде болған. Заң бойынша, құжат қазақ тілінде болуы керек. Университеттің құжаттарында құқықтық мәселелер көп. Мысалы, келісімшартта студент 40 сағат сабақтан қалса деген талап бар, ал университеттің ішкі ережесінде 60 сағат деп көрсетілген", – деп түсіндірді Ақерке Абылайхан.
Оның айтуынша, студенттердің құқықтары толық сақталған, олар оқудан шығарылмайды.
"Студенттің сабаққа келмеу себептерін зерттейміз. Студент сабаққа міндетті түрде қатысуы тиіс. Қазірдің өзінде 100-ден астам студенттің түсініктемесі алынған, әртүрлі себептер айтылды. Олар сабаққа қатысатындарын және сессияны аяқтайтынын мәлімдеді. Сонымен қатар, басқа университетке ауысу мүмкіндігі де бар", – деді ол.
