1 сәуір күні сағат 19.00 шамасында Қарағанды облысы, Ақтоғай аудандық полиция бөліміне Ақтоғай ауылында екі баланы ит қапқаны туралы ақпарат түсті.
Полиция қызметкерлерімен анықталғандай, 3 және 5 жас аралығындағы екі бала өздерінің үйінің ауласында ойнап жүргенде бос жүрген ит қауып алған. Итке таланған екі баланы дереу арада ауруханаға жеткізген. Алайда ауыр жарақат алған 3 жастағы баланың өмірін сақтап қалу мүмкін болмады.
"Екінші бала ауруханаға жатқызылды. Аталған факт Ақтоғай аудандық Полиция бөлімінде тіркелді. Тергеу амалдары жүргізілуде", – деп мәлімдеді облыстық полиция департаментінің баспасөз қызметі.
Дәрігерлердің мәліметінше, ауруханада жатқан 5 жастағы баланың жағдайы тұрақты ауыр деңгейде. Қауып алған ит сол үйдің иті болып шыққан.
Арайлым Еркебаева
