Мәдениет және спорт министрлігінің тапсырысы бойынша түсірілген Дарежан Өмірбаевтың "Ақын" фильмі 10-20 қараша аралығында Португалияда өткен Lisbon & Sintra Film Festival 2022 (LEFFEST) кинофестивалінің Бас жүлдесін жеңіп алды, деп хабарлайды inbusiness.kz.
Фильм технологияның даму дәуірінде түсініксіз және маңызды емес болып қалудан қорқатын ақын туралы баяндайды. Сценарий неміс жазушысы Герман Гессенің "Авторлық кеш" әңгімесіне негізделген. Таспаның түсірілімі Алматы, Алматы облысы және Атырауда өтті. Басты кейіпкерді белгілі әнші және музыкант Ердос Қанаев сомдады.
Еске сала кетсек, фильмнің әлемдік премьерасы 2021 жылы Жапониядағы 34-ші Токио халықаралық кинофестивалінің басты байқауында өтті, онда фильм "Үздік режиссура" үшін марапатталды. Осы жылдың басында фильм Германиядағы 72-ші Берлин халықаралық кинофестивалінде байқаудан тыс көрсетілді. Сондай-ақ "Ақын" Бразилиядағы Olhar de Cinema халықаралық кинофестивалінде "Үздік фильм" сыйлығын жеңіп алды.
Айта кетсек, 14 желтоқсаннан бастап "Ақын" Франция кинотеатрларында прокатқа шығатыны белгілі болды.
