ҚМДБ Семей аймағы өкілдігінің ұйымдастыруымен Алаш ордасының құрылуына 100 жыл толуына орай қалалық мешіт имамдары мен жамағат арасында шағын футболдан жарыс өтті, деп хабарлайды ҚМДБ баспасөз қызметі.
Мешіт имамдары ақ сәлде, ақ шапанын спорттық киімге ауыстырып, тұтас бір күнін футбол алаңында өткізді. Дін қызметкерлерінің көркем уағызын тыңдап, иман байлығын жиып жүрген жамағат бұл жолы мешітте емес, "Жастар" спорт кешенінде бас қосты. Қала, аудан, ауылдардан жиналаған қатысушылар 11 командаға бөлініп, тартысты ойын өткізіп, асыл дініміз бен қатар спортты, салауатты өмір салтын кеңінен дәріптеді.
Көш бастаған Семей қалалық "Тыныбай" мешітінің командасы кубогты иеленіп, жеңіс тұғырынан көрінді. Семей қалалық "Бұйғылы" мешітінің командасы 2-орынға жайғасса, Мешіт жамағаты командасы 3-орынға табан тіреді. Сонымен қатар "Үздік қақпашы", "Үздік шабуылшы", "Үздік қорғаушы" номинацияларының иелерін Семей аймағындағы өкіл имам Алтыбай Қуанышұлы марапаттады.
