Мұны Алматы облысының Өңірлік коммуникациялар қызметінің алаңында шаһар басшысы Әркен Өтенов айтты, деп хабарлайды inbusiness.kz сайты.
Оның сөзінше, ономастика саласы бойынша Алатау қаласы әкімшілік-аумақтық құрамында 12 шағын аудан бар. Көшелердің жалпы саны 366 болса, 24 көшенің атауы қойылмаған.
– Қазір қала аумағындағы жаңа құрылыс алаңдарында атауы жоқ 24 көше бар. Атап айтар болсам, Жаңаталап ықшам ауданындағы 8 көшеде, Ынтымақ ықшам ауданындағы 15 және Жаңадәуірдегі 1 көшеда атау болмай тұр, – деді шаһар басшысы.
Қалада атауы идеологиялық тұрғыдан ескірген немесе мән-мағынасы жоқ көшелер де кезігеді.
– Ескірген 26 көшенің атауын өзгерту туралы сұраныс хаты облыстық ономастика бөліміне жолданды. Жоспарға сәйкес, көше атауларын өзгерту осы жылдан бастап қарастырылатын болады, – деп қоса кетті Әркен Өтенов.
